“Here, there and everywhere”

Laugardaginn 7. apríl kl. 14:00 verður opnun á sýningu Erlu Haraldsdóttur og Bo Melin, “Here, there and everywhere”, í galleri@hlemmur.is

Erla S. Haraldsdóttir fluttist til Svíþjóðar 10 ára að aldri og hefur eftir það einungis búið hérlendis nokkur styttri tímabil, ma. við nám í Menntaskólanum við Hamrahlíð. Hún nam myndlist (og blandaða tækni) við Konunglega Listaháskólann í Stockhólmi, San Francisco Art Institute ásamt Listaháskólanum Valand í Gautaborg, og útskrifaðist þaðan 1998.

Bo Melin er fæddur og uppalinn í Svíþjóð. Hann er menntaður við Konstfack í Stockhólmi og Listaháskólann Valand, og útskrifaðist þaðan 1997.

Med sýningunni “Here, there and everywhere” leika sér Erla og Bo að því að skekkja þann raunveruleika sem við eigum að venjast í okkar daglega umhverfi. Þau breyta hinni einsleitu og (monocultural)  Reykjavík í fjölþjóðlega (multicultural) borg með aðstoð stafrænt myndbreyttra ljósmynda.

Við undirbúning sýningarinnar ferðuðust Erla og Bo til San Franciso og Berlínar, þar sem þau mynduðu stórborgarsamfélagið og íbúa þess.

Þetta er annað samvinnuverkefni þessara tveggja listamanna. Fyrir hálfu ári síðan unnu þau fimm metra langa panorama-mynd af torgi í Skoghall, sem er lítill smábær í mið-Svíþjóð. Í myndverki sínu, sem sýnt var í listasafni Skoghalls, gjörbreyttu Erla og Bo smábænum í stórbæjarúthverfi í algerri niðurníslu. Skoghall er mjög gott dæmi um lítið velferðarsamfélag án stærri vandamála og var þess vegna vel til verkefnisins fallið.

Það er auðvelt að taka hlutum og aðstæðum sem sjálfgefnum, sérstaklega í manns eigin umhverfi. Ef maður lifir í stöðugu samfélagi skapast auðveldlega eins konar miðlægt sjónarhorn (central perspective), þar sem upplifun manna um hvað sé rétt og rangt og hvað sé eðlilegt, mótast af þeirra nánasta samfélagi.

Það eru vangaveltur í kringum þessar hugmyndir sem Erla S. Haraldsdóttir og Bo Melin hafa unnið útfrá við gerð þessarar sýningar, og á hún vonandi eftir að velta upp enn fleiri vangaveltum hjá sýningargestum.

Verið hjartanlega velkomin! Erla S. Haraldsdóttir og Bo Melin